من ضمن الاسئلة اللى الناس بتسألنا كتير عنها الصراحة
لان فيه ناس كتير بتدخل حاسبات جديدة متعرفش ايه الدنيا ولسة الشائعات حول انها كلية بتعلم تصطيب الويندوز لسة وانها معهد وان الواحد ميفرقش عن واحد اخد كورسات
لكن الصراحة عكس كده تماما
انا هتكلم عن الخريج اللى خارج على الاقل فاهم حوالى 70 % من الكورسات اللى اخدها فى الكلية
انا اتكلمت قبل كده من منظور تانى غير اللى هتكلم عنه دلوقتى فى اللينك دهhttp://goo.gl/AQziYO
لكن بعد ما حضرت مع دكتور قالنا على حاجات متخصصة اكتر
الكودر اللى واخد كورس انا مش بقلل منه بس هو بيعرف يكتب كود ماشى وزى الفل تمام ماهو اخد دورة برمجة فى لغة ما وبيحط فى الحسبان فى الكود بتاعه بعض constraints
خريج حاسبات
مش بكبر من نفسى ولا حاجة
انا فى اول سنتين عمال اخد مواد مالهاش علاقة بالقسم بتاعى عامل اخد شوية Database على شوية networks على شوية برمجة مش بس كده لأ انا اخدت 3 كورسات برمجة لل C++ غير ال introduction فى اول تيرم
هتكلم مش على نفسى بس على اى حد بعد ما يكون فهم الحاجات دى كويس
بعد ما يخلص يقدر يشتغل ويعمل مشروع كامل ويراعى حاجات كتير اكتر من اى كودر عادى ليه لانه اتعامل مع برامج كتير فى 4 سنين وعمل بتاع 12 مشروع على الاقل يعنى واشتغل مع تيمز كتير من انواع مختلفة من الناس او ممكن هما نفس الناس
مع كل كورس بياخده او مرة اخد برمجة اخد syntax وفهم شوية دنيا بعد كده بقى علشان يحسن الكود بتاعه اخد ايه ؟
اخد oop مثلا علشان يشتغل objects ويعرف يقسمهم لحاجات كتير علشان يقدر يعدل على الكود لو ظهرله غلط او مثلا العميل قاله عدل على حاجة
بعد كده اخد حاجة اسمها files organization كل اللى هيعمله فى الكورس ده انه عرف ازاى يسجل الداتا على الهارد ديسك بعد ما يخلص علشان الداتاب متضعيش لو شغال مثلا فى صيدلية تعرف ايه اللى عندك وايه الناقص وايه اللى مش ناقص وايه اللى قرب ينتهى وكده ومش بس كده لأ تخزنه بقى بطريقة محدش يعرف يقرأه ويعدل عليه علشان محدش يدخل مثلا على الفايل ويلعب فى الارقام ويسرقنى وده كله ومع الوقت كل شوية طريقته فى كتابة الكود عمالة تتحسن وعمل لنفسه كود ستايل لوحده
بعد كده بقى ياخد حاجة اسمها data structure مثلا يتعلم فيها شوية methods كده علشان يحسن اكتر من الكود بتاعه ويتعلم ازاى يسرع الكود بتاعه علشان العميل مايتب... مايتخنقش لو اشتغل على برنامج مثلا ويستنى بتاع ربع ساعة علشان يفتح وكمان يشوف الميمورى ويحاول يستخدم اقل حاجة منها علشان الجهاز ذات نفسه ميكونش بطئ منك ولا حاجة وتحاول كل ده ومع الوقت بتتعمل اساليب اكتر ومع السيرش طوال ال 4 سنين بتتعلم ازاى تبحث وازاى تجيب المواقع المحددة وازاى تتعامل مع جوجل وتستخدم الtools علشان توصل لاحسن نتيجة بحث فى اقل من .0000000001 ثانية
وكمان تكون كونت list على اليوتيوب بالقنوات اللى كنت بتنزل من عليها الكورسات وكمان تتعلم ازاى تتعلم مع نفسك عن طريق النت لان الدكاترة مش بتقول كل حاجة بس فى الامتحان حاجة تانية خالص ده غير كل الماتيرال اللى بتجمعها طول ال 4 سنين دى والكورسات اللى انت ملكش دعوة بيها ممكن تفكر لو تتعلمها من الاول وجديد هيكون سهل عليك شوية عن اى حد جديد
غير انك خلاص بيكون ليك نظرة من فوق انك لما تبدأ تعمل مشروع تبدأ ازاى وتقسم الشغل ازاى و تعمل حاجة محترفة كده نوعا ما
وبعد كده يقولك بنصطب ويندوز اها يعم احنا بنسطب لينكس لو تعرف تصطبه ياسطى يبقى ليك الكلام
#الكلية_مش_بتدى_كل_حاجة
#طالب_الحاسبات_المتوسط_نوعا_ما
